Aġġornat il-Tlieta 7 ta’ Ottubru, 18:15

• F'konferenza ta' l-aħbarijiet li matulha l-GRTU ħabret il-proposti tagħha dwar ir-reviżjoni tat-tariffi tad-dawl u l-ilma, id-direttur generali tal-GRTU Vince Farruġia Qal li t-tariffi tad-dawl u l-ilma kif proposti mill-gvern se jgħollu l-inflazzjoni f'pajjiżna. Saħaq dwar il-bżonn li jsir dibattitu dwar it-tariffi l-ġodda  filwaqt li appella li jitfassal pjan li permezz tiegħu jittaffa l-piż.
• Meta kienet qed tagħti r-reazjoni tagħha dwar ir-riforma fis-servizz tat-taxis, il-Federazzjoni tat-Trasport Pubbliku wissiet lill-Ministeru tat-Trasport biex jirrispetta dak li kien miftiehem fl-aħħar strajk li seħħ f'Lulju li għadda fil-qasam tat-trasport, jekk ma jridx li jerġa jkollu xi paralizzazjoni fis-servizz tat-trasport pubbliku. 
• B'reazjoni għal dak li qalet il-federazzjoni tat-trasport publiku, l-Gvern għamilha ċara li  bl-ebda mod m’hu se jkun ikkundizzjonat bit-theddid ta’ strajk. Qal li se jkompli jonora l-wegħda li għamel li jkompli bil-proċess ta’ konsultazzjoni.
• L-organizzazzjoni Żminijietna – Leħen ix-Xellug appellat lill-Gvern Malti biex fil-baġit li jmiss jiffoka fuq kwistjonijiet bħall-għoli tal-ħajja, ix-xogħol, il-qasam tad-djar, it-trasport u l-enerġija.
• Il-GWU u l-UĦM illum qed jingħaqdu mas-sejħa tal-Konfederazzjoni Internazzjonali tat-Trade Unjons  biex ifakru l-jum dinji għal xogħol diċenti.
• ufficċjali tad-Diviżjoni Propjeta’ tal-Gvern  waħħlu ittri ta’ avviż ma’ 10  strutturi f’Għajn Tuffieħa li jirriżulta li qed jiġu użati minn persuni mingħajr titlu jew jedd fuq l-art.   Dawn l-istrutturi li jinsabu kollha fil-barracks ta’ Għajn Tuffieħa ġew servuti b’avviż ta’ sebat ijiem biex jevakwaw il-post.  
• Erba' żagħżagħ minn Ħal Qormi, li għandhom bejn l-14 u s-16-il sena, qed jinżammu arrestati mill-pulizija għal stharrig li qed isir b'rabta ma' serq ta' muturi u attentat ta serq minn ħanut.
• F'inqas minn gimgħa, uffiċjali tad-dwana ta' Malta rnexxilhom jikkonfiskaw kwantita' oħra ta' xorb alkoholiku. Il-kas seħħ matul il-lejl ta' bejn il-Hadd u t-Tnejn, meta trakk żgħir twaqqaf minn uffiċjali tad-Dwana mis-sezzjoni tal-Infurzar hekk kif kien ħiereġ minn fuq il-moll. It-trakk  kien għadu kif wasal Malta minn Sqallija u kien misjuq minn raġel Taljan, li kien akkumpanjat minn ragel iehor taljan. It-trakk kien dikjarat li qed iġorr  toilet paper, tissues, ħwejjeġ u tazzi tal-inbid iżda irriżulta li mal-merkanzija ddikjarata kien hemm ukoll kwantita' ta' xorb alkoholiku, li ġie konfiskat.
• Fil-Lussemburgu, illum se ssir laqgħa tal-Ministri ta l-Affarijiet Ekonomici u l-Finanzi ta l-Unjoni Ewropea fl-isfond tal-kriżi ekonomika finanzjarja li qed taħkem lid-dinja. Malta f'din il-laqgħa se tkun rapreżentata mill-Ministru tal-Finanzji, l-Ekonomija u l-Investiment, Tonio Fenech.
• Matul ix-xahar li għadda,  l-MEPA iddeċidiet 676 applikazzjoni u rceviet 495 applikazzjonijiet ġodda.  Barraminhekk, kien hemm 4.667 applikazzjoni pendenti fl-aħħar tax-xahar.
• Il-Kap ta’ l-Oppozizzjoni u Mexxej tal-Partit Laburista Joseph Muscat jinsab il-Libja fuq ħidma tal-Partit. Din l-ewwel żjara barra minn Malta ta’ Muscat bħala Kap ta’ l-Oppożizzjoni, ma tidhirx li ilha ppjanata tant li hu kellu bosta impenji ppjanati għal-lum li ġew imħassra.
• Il-Viċi Prim Ministru fit-Tajlandja qal li se jirriżenja bħala responsabbilta għal inċidenti li seħħew fejn ta' lanqas 65 persuna ndarbu meta  l-pulizija fetħu n-nar biex iferxu lid-dimostranti li ċċirkondaw il-bini tal-parlament f'Bangkok, u kienu qed jiprotestaw kontra l-gvern.
• 40 persuna sofrew ġrieħi f’inċident li wassal biex ajruplan tal-linja ta’ l-ajru Qantas jagħmel inżul ta’ emerġenza fil-punent ta’ l-Awstralja. Abbord l-ajruplan kien hemm 313-il persuna. L-ajruplan kien fuq titjira minn Singapore lejn Perth.
• It-temp għal għada : Pjuttost imsaħħab bix-xita minn ħin għall-ieħor. L-ogħla temperatura: 23°c. Indiċi UV: 6.